Semana da Ciencia

Boas familias!

A semana pasada un pequeno momento da xornada escolar de cada día estivo dedicado á Ciencia, polo que durante algúns días fomos levando a cabo diferentes experimentos.

Así pois, o luns demos comezo coa astronomía e estivemos simulando o día e a noite. Para iso, nun globo de cor azul pegamos os diferentes continentes, como se fose a Terra, e cunha lanterna deixando a aula en penumbra, fomos iluminando as caras do globo á medida que o facíamos xirar lentamente, observando así os momentos do día (Amencer, Mediodía, Anoitecer e Medianoite) nos diferentes continentes.

O martes, estivemos experimentando coa química, e realizando diferentes hipóteses sobre materiais que se disolven ou non na auga. Para iso, enchemos 3 vasos de auga e en cada un deles botamos azucre, sal e area. Despois de hipotetizar que materiais se disolverían e despois de remover puidemos ver que o sal e o azucre son sustancias que se disolven na auga, mentres que polo contrario a area non se chega a disolver.

O mércores, estivo dedicado á bioloxía, polo que nos convertemos en detectives  e fomos polas diferentes estancias do colexio en busca de pegadas de animais para poder identificalas. 

O xoves, dedicámolo á xeoloxía e estivemos simulando o interior das capas da Terra cunha mazá. Para iso, cortamos unha mazá pola metade e unha das metades premémola contra o tapón de tinta como se se tratase dun selo, e logo, coidadosamente, volvémola premer contra un papel durante uns segundos. Logo disto, con coidado retiramos a mazá do folio e observamos que a estampación semellaba o interior da Terra. 

Como podedes observar nas fotos pasámolo moi ben realizando ditos experimentos e con eles aprendemos moitas cousas.

Un saúdo!