Excursión ao Monte Penide

Ola familias!

Como xa sabedes o pasado venres os nenos/as de Educación Infantil tivemos unha saída ao Monte Penide, situado en Redondela, pois aproveitando que estamos a abordar a temática da Prehistoria a través do Proxecto Integrado de centro, dita saída era unha gran oportunidade para poder ver e analizar de primeira man diferentes restos arqueolóxicos conformados principalmente por petróglifos e mámoas, que converten a este lugar nun dos xacementos arqueolóxicos máis importantes de Galicia.

Así pois, unha vez que chegamos ao noso destino, o primeiro punto que visitamos foi a mámoa do Rei, un dos 39 túmulos que conforman a necrópoles do Monte Penide, e o cal actualmente é o único que se pode visitar e acceder a el, pois o resto aínda se atópanse enterrados e sen sinalizar.

Como ao interior da mámoa non podíamos acceder todos/as a un mesmo tempo, debido a que o espazo é bastante reducido, establecemos quendas por clases para poder vela. Mentres tanto, as clases que esperabamos para visitala estivemos investigando diferentes espazos polo monte e recollendo distintos elementos naturais (paus, piñas…) para ambientar a cova que creamos na entrada do noso colexio.

Cando rematamos de ver a mámoa, emprendemos camiño cara aos petróglifos de Chan da Cruz. A estes só fomos capaces de chegar os nenos e nenas de 5º e 6º de E.I., pois os nenos/as de 3 anos xa estabamos algo cansos de andar e preferimos quedar investigando nunha zona do monte diversas pegadas que había polo chan, e recollendo máis elementos naturais.

Posteriormente reunímonos todos/as de novo e paramos un anaco a comer unhas galletas e a beber auga para repoñer forzas e emprender o camiño de volta ata onde nos agardaba o autobús.

Como podedes observar nas fotos durante a excursión pasámolo moi ben e gustounos moito ver os distintos xacementos que conteñen mostras dos nosos antepasados.

Un saúdo!